MNF chuan, MNF Ministry-in ram mamawh belh ang lei belha lungphum phum mai theiha a lo peihfel vek hnuah Mualkhang Bottling Plant lian zawka siamna tur sanction order a chhuak ta hi MNF chuan lawmawm a ti tak zet a. Ram mipui nitin mamawh phuhrukna tur ram rotling a nih ngei theih nan uluk taka vil zui turin ZPM kaihhruai Sorkar leh FCS&CA Minister te a chah nghal bawk, an ti.

1) Hmalakna hmasa ber chu November 5, 2019 ah a ni. IOCL hotuten Chief Minister hmasa Pu Zoramthanga leh FSC&CA Minister K. Lalrinliana an rawn hmu a. Mizoram nitin mamawh LPG hnianghnar zawka kan hmuh theih dan tur leh LPG Bottling Plant siamṭhat leh tih-len dan tur an lo sawipui a. CM chuan IOCL hotute hnenah Mizoram chu tri-junction area-a awm kan nih avanga intlawhpawh kawnga harsatna kan tawh tam ṭhin thu leh nitin mamawh chakkhai (essential commodities) dahṭhatna neih chu Mizoram tan a pawimawh thu a lo hrilh bakah, chutianga hma la tura an mamawh ram leh thil dangte chu ngaihtuah sak an tum thu a hrilh.

2) Kum 2006-a din Mualkhang Gas Bottling Plant hian Oil Industry Safety Directorate-in safety norms an siamte a phak tawh loh avangin January ni 19, 2020-ah tihtawp a ni a. Tihtawp a nih hnu lawk March 11, 2020 khan FCS&CA Minister K. Lalrinliana hovin Sorkar Officials ten Bottling Plant tharthawh lehna tur leh siam len dan tur enin Mualkhang Gas Bottling Plant an tlawh a, hma lak zui nghal a ni.

3) February 9, 2021 khan Mizoram Sorkar hmalaknain Mualkhang Gas Bottling Plant (IOC Ltd. LPG Bottling Plant) chu siamṭhat leh tih-len a nih tur thu puan a ni a. Mizoram Sorkar chuan Mualkhanga IOCL LPG Bottling Plant siam lenna turin ram zau tak, 2 Hectares chu tuna Bottling Plant awmna ram hrulah Rs. 47 Lakh man a lei belh a, IOCL hnenah a hlan zui. Plant hmasaa Cylinder 2500 siam ṭhin chu nitin Cylinder 7000 (Truck phur 24) siam chhuah tum a nih thu te, Plant tharah hian 30 ΤΜΤΡΑ - 30,000 metric tons per annum (kum khata metric ton 30,000 siam chhuak thei tur)-a duan a nih thu leh thla 24 chhunga siam zawh tura ruahman a nih thu MNF Ministry khan a lo puang fel daih tawh a ni.

4) Mualkhang LPG Bottling Plant siamṭhat leh tih-lenna tura hmalakna leh indawrna kal zelah CM Zoramthanga chuan January 21, 2022 khan Pu S.M. Vaidhya, Chairman, IOC Ltd. hnenah D.O. Letter (No.D.11014/3/2019-FCS&CA) thawnin, LPG Bottling Plant siam lenna tura ram mamawh belh chu Mizoram Sorkarin a peih fel tawh thu leh IOCL te pawh a hma thei ang bera hna chhunzawm turin a ngen.

5) S.M. Vaidhya, Chairman, IOC Ltd. pawhin February 2, 2022 khan CM hnenah lehkha rawn thawn let nghalin Mizoram Sorkarin Bottling Plant tihlenna tur ram Hectares 2 (5 acres) lai a pek avanga an lawmzia leh hma an lak zui dan tur te, Bottling Plant chu kum 2 chhunga thawh zawh tur a nih thu a rawn sawi ve bawk.

6) July 19, 2023 khan Indian Oil Corporation Limited hotuten FCS&CA Minister K. Lalrinliana chu a pisaah an hmu leh a. Mualkhang Gas Bottling Plant siamṭhat leh tih len hna ṭan thuai a nih tur thu rawn sawiin, hna ṭanna tur lungphum phum dan tur an sawipui.

7) Mualkhang LPG Bottling Plant siamṭhat leh tih-lenna tur chu lung phum mai theiha peih a nih hnuah Union Minister of Petroleum and Natural Gas, Hardeep S. Puri chu Bottling Plant lungphum phum tura beisei a ni a. Indawrna a kal chhung leh sanction order nghah a nih mek laiin Mizoram General Election 2023 Election puan a ni a, Election Model Code of Conduct puan zui a nih avangin MNF Ministry hunah lungphum phum leh sanction order hmuh hman a ni ta lova; Sorkar tharin Sorkar hmasa hmalakna rah a lo hmu ta mek a ni.

Mizoram mipui nitin mamawh Gas hnianghnar tak kan hmuh theihna tura MNF Ministry hmalakna 'LPG Bottling Plant' siamṭhatna leh tih-lenna tur sanction order a chhuak ta hi MNF chuan lawmawm a tiin Central Sorkar, Ministry of Petroleum & Natural Gas leh Indian Oil Corporation Limited chungah lawmthu a sawi a. Ram mipui mamawh LPG Bottling Plant lian zawk kan neih theihna tura theihtawp chhuahtute Chief Minister Zoramthanga, FCS&CA Minister K. Lalrinliana, Revenue Minister Lalruatkima te bakah, a hlawhtlin theihna tura tha leh zung sengtu zawng zawngte chungah lawmthu kan sawi a, chhuanawm kan ti tak zet bawk.

Hetiang hi thil awmdan dik tak a nih laia Sorkar hmasain theihtawp chhuaha LPG Bottling Plant siamṭhat leh tih-lenna tura tha leh sum a lo sen tawhna sawi bo a, Sorkar thar hmalakna vek anga FCS&CA Minister-in Sorkar thuchhuah a siamtir duh hi MNF chuan mak a ti hle a. Sorkar hmasa hmalakna engmah awmlo ang maia sawi duh Minister kan hrawn hi MNF chuan vanduaithlak a ti hle a; 'Nu leh Pa' te In sak zawh saa 'name plate' tar lo tum ve ngawt angah a chan a ni.

ZPM kaihhruai Sorkar hi naupang chhe zia pu chunga Sorkar kal tawhte puhchhiatna tur ringawt zawng tawh lova puitlin lam pan turin kan duhsak tak zet a. Sorkar hmasa MNF Ministry hmalakna avanga sanction order lo awm ta Mualkhang LPG Bottling Plant siam lenna leh siamṭhatna tur pawh hi ram mipui nitin mamawh phuhrukna tur ram rotling a nih ngei theih nan uluk taka vil zui ngei turin MNF chuan ZPM kaihhruai Sorkar leh FCS&CA Minister te a chah nghal bawk, an ti.